歐豬五國主權債危機搞到金融市場喺上一季非常波動，令到好多間喺首季炒賣未嘗敗績嘅大行表現差咗，就連高盛都唔能夠倖免，上季有10個交易日輸錢收場，其中3日更輸過億美金（約7.8億港元），可見個市真係好難玩。
雖然係咁，高盛話晒都係投資銀行一哥，最擅長以炒賣食糊，所以戰績都唔會太差，喺上季65個交易日裏面，有55日有錢贏，當中17日仲日賺過億美金，即係贏面高達85%。至於高盛嘅主要對手摩根士丹利，上季亦有11日輸錢，但未試過每日輸多過7500萬美金，唔超出銀行嘅風險預算都算係咁啦！而喺手風順嘅日子，大摩亦試過日賺1.75億美金，上落咁大，心臟負荷能力真係差啲都唔掂呀！
李華華