富商魯連城喺大浪西灣起私人樂園，全城鬧爆，市民直指政府保護大自然環境不力。負責相關政策嘅環境局局長邱騰華同發展局局長林鄭月娥，初初不情不願行出嚟話好重視單嘢，嗱嗱臨將幅地納入發展審批地區圖，聲稱以後有乜發展都會受監管。不過，事隔半月，兩位局長似乎都冇認真處理過，點樣將幅地恢復原貌，不了了之。
兩個局長做唔到嘢，人人有眼睇。西貢大浪灣關注組十幾個代表，噚日由中環遮打花園操上禮賓府，邀請特首煲呔一齊悼念「大浪西灣已死」，關注組成員仲默哀同獻花。煲呔唔企出嚟參加悼念儀式冇所謂，但唔該督促吓啲局長做嘢，全香港有成55個好似西灣嘅高危地區o架。