人生如戲，對年屆60的中文老師鄧慕貞來說，這台春風化雨劇目，五味雜陳。平鋪直敍的教師生涯，至中段突然加插充當話劇社顧問情節，轉合有如夏風吹醒一池晚荷，自此跌宕變奏，不再平淡。落幕了，身為主角的鄧老師，只求這36年來的人生表演，照到每一學生觀眾的生命，待他們走出劇院後，踏出不一樣的人生路。
只懂皮毛 幸學生熱誠
帶領沙田蘇浙公學劇社20年，以為鄧老師滿腹戲劇理論和方法演技，「唔係呀，當年我淨係識教中文、中史，乜嘢戲劇我丁多都唔曉」。74年加入沙田蘇浙公學，教學生涯無風無浪，90年校方忽然要求她帶課外活動，「話要搞劇團，叫我做副導師，做做吓又變咗坐正，即係打落水狗啫」。
逼上梁山，鄧老師只得四出找人打救，「打去演藝學院，人哋話冇課程畀中學老師，叫我試吓上業餘劇團課程」。學習何為演出技巧、劇本創作，一年時間只學懂皮毛，幸好學生滿腔熱血，將劇團工作分配得井井有條，「負責寫劇本嘅中四同學，為咗排劇唔上堂，結果梗係俾其他老師話」。同學名叫邵美君，今年香港舞台劇獎「最佳女配角」得主。
貴為鼎鼎大名惡老師「沙蘇四虎」之一，鄧慕貞上課無比威嚴，但廿年「搭單」生涯卻教她態度軟化，「好多嘢好似演員咁係有唔同嘅面，唔可以只用一個角度去睇，同學生相處都係一樣」。但綜觀20年，學生越來越自我中心，「以前大家齊心為套戲，做演員定燈光師都冇問題；呢一代嘅後生仔女會有目的，講明唔係主角唔會做」。
不懂教學生表演技巧，鄧老師以人生經驗為學生彌補不足；劇社要做佈景，她捋起衣袖親力親為；有學生團員家中失火無家可歸，她又幫忙找社工安排公屋。對學生的支持和關懷，讓她由猛虎變成劇社不可代替的圖騰。
人生經歷 被搬上舞台
36年從未跳槽，鄧老師今年功成身退，劇社歷年成員為她送上榮休禮物：以她的人生作藍本的舞台劇《老唔老師》，本周公演，故事情節有真有假，但劇本的一字一句教鄧老師驚訝，「好多情節我冇諗過佢哋會知，好感動，佢哋將我記在心頭」。
舊生聚首一堂，卻少了一人。08年，林振輝因佯裝劍橋畢業生行騙及虧空公款，入獄7年，傳媒稱他「港版捉智雙雄」，「佢當年做SM（舞台監督），成日俾演員蝦，但係佢冇呃過我」。身陷囹圄，編劇讓振輝於劇中以黑社會大佬的身份出現，還有一幕「2014年再重逢」，給劇中鄧老師一個釋懷的結局。
舞台上可選擇在瀟灑壯麗中謝幕，但鄧慕貞的「演員」生涯尚未終結，下一劇目是「退休生活」，「會去學中醫，去柬埔寨、西藏呢啲未去過嘅地方旅行。有生之年，希望可以等到振輝出來，再同佢傾吓應該點做人」。
記者 夏志禮