會考已告一段落，以後三三四學制嘅文憑試登場，想唔到竟有一位市民申請司法覆核，要求有會考，真係屬於世事無奇不有之類。納稅人嘅錢又試無無謂謂浪費咗一啲。維持民主自由法治，要付出代價嘅，此是一例，乃無可奈何之事。另外一宗令人不明所以之事，就係有中大學生/校友司法覆核中大之雙語教學政策，指中大應該以中文教學，官司一審時，原訴人敗訴，本以為就此了結，但原訴人上訴，又被判失敗，法官指中大用英語教學，並無不合。中文大學幾十年來皆以雙語教學，甚至係三語（英語、普通話、粵語）教學，多年來行之有效，突然間有新一代反對，要打官司，中大被逼支付律師費，果真寃枉。
一位中大學生來電郵，講及放棄港大法律系而進入中大政治系，最近（八月四日）查網上資料，竟然發覺維基百科內關於香港大學一段，有下列敍述─
「香港大學學生在社會的地位
多年以來香港大學作為香港唯一一間大學，其學生深受香港政府與社會各界的關愛，這些關愛到回歸以後的特區時期仍然保留下來，目前香港政府有所有問責局長當中有四分三（11名）是出身自香港大學〔13〕，每年香港政府會向香港大學索取應屆畢業生名單，選舉一些優秀的香港大學學生並發出任職政府部門中高層職位（如政務主任或紀律部隊督察）的邀請，香港大學學生可以直接獲得聘用，無須通過考試。加入香港政府的香港大學學生亦可獲得優先晉升的機會。此外香港政府亦會直接揀選香港大學學生參與專上學生暑期實習計劃，給予香港大學學生寶貴的工作經驗。」
呢位中大同學C對此深感疑惑，尤其係佢好想入特區政府做AO㖭。左丁山見到，有啲唔信，自己上網睇睇，維基百科確係有此一段噃，但左丁山點都唔信，香港大學學生可以直接獲得特區政府聘用，毋須通過考試？維基百科上述呢一段，應是吹水之作。同學C既有志做政務官，不妨寫封電郵直接向公務員事務局常任秘書長黃灝玄查詢港大生是否有優待，黃秘書長就係中大聯合書院政治系畢業生，相信佢一定有一個清晰答案，不必以訛傳訛，形成不滿情緒。
講番故事，中大成立之後頭十幾年，港英政府與不少商業機構確實係歧視中大，偏愛港大嘅，當年一間銀行就聲明港大生月薪千元，中大生月薪八百，最公道嘅係美資公司，早在七十年代初已對中大港大一視同仁，無分彼此。今時今日咯喎，除非中大學生自毀形象，粗魯不文咁嚇怕僱主啦，否則與港大生在競爭好工方面，一定係平起平坐。