楊千嬅於年底補擺喜酒前先在10月開騷，雖然已嫁作人婦，不過未有影響叫座力，個唱門票昨日公開發售，有fans竟早一日排隊霸頭位搶購，反應熱烈，結果搞到售票網絡一度癱瘓，主辦單位決加開一場，千嬅得知反應熱烈也不禁笑說：「真係唔開騷都唔知自己咁襟撈。」
丁太楊千嬅鐵定在12月20日補擺喜酒，但一向事業行先的她先於10月在紅館開「Ladies&Gentlemen演唱會」，早前已開始優先訂購，門票被一掃而空；至昨日公開發售，有fans足足排28個鐘頭隊爭頭位買飛，上午售票網更一度大塞車癱瘓，由於反應理想，主辦單位宣佈加開11號一場，合共五場，千嬅得知反應理想即時在微博報喜，更笑言：「真係唔開騷唔知自己咁襟撈。」
婚後首個演唱會，千嬅坦言壓力一定有，但她有信心可以做到最好，問到是否婚姻給她很大力量？千嬅說：「當人去到人生另一個階段，情緒上會處理得更好，面對所有嘢都會平和同定好多。」
擠爆售票網
提到售票網一度癱瘓，千嬅表示亦有所聞，她也得知有fans專程請假排通宵買門票。
另外日前千嬅就為新歌《斗零踭》拍MV，她更出動私伙高踭鞋拍攝，令拍攝現場十足鞋海一樣，千嬅表示，「唔拍MV都唔知自己有咁多鞋，導演話要多啲斗零踭，我咪開櫃攞鞋幫手，點知發現有啲都未着過。」千嬅表示她十分喜歡《斗零踭》，她坦言想不到藍奕邦可以寫出這種女人心態的歌詞，她笑言有機會想請藍奕邦上台表演穿斗零踭，她覺得對方會有型過澤田研二。
黑面治老公
另外，千嬅昨日到九龍塘出席聯合國兒童基金會活動，她表示早前到埃塞俄比亞探訪，因當地少女經常被侵犯，故有機構教她們防狼方法，千嬅都即場學幾招，會否用來對付丁子高？千嬅笑說：「唔會，我會用智慧，唔會動手，30幾歲人，唔會好似細個咁成日發脾氣，最多我會黑面，我一黑可以黑過陳奕迅，老公就好怕。」
採訪：楊潔雯
攝影：陳俊強
