深水埗四大腦場喺呢個月18日至25日一連八天舉行夏日電腦節，不單止比電腦商會喺灣仔會展搞嘅電腦通訊節早兩日開鑼，佢哋斥資嘅費用比今年初嘅腦場電腦節仲多10倍，真係想撼低電腦通訊節喎。
42吋高清電視機$3,999
主辦單位電腦協會常務副主席呂健忠KC噚日同小妹講，今次腦場花咗100萬搞呢個電腦節，其中有50萬倒貼畀消費者，所以每日有成300至360件割喉式減價產品益街坊，成個腦場電腦節就有成2,500件，唔似得對家啲優惠產品每日限售十件八件。
KC話，今次主打嘅割喉電腦產品係Netbook，劈價三成，每日售賣嘅數量高達60部，「呢啲Netbook係新型號，牌子名家未講得住，有啲現價賣緊$2,599，腦場價係$1899；有啲型號家賣緊$2,399，腦場價$1,699。我哋唔係玩噱頭賣幾部，而係預備咗480部割喉式咁賣，每賣一部，腦場補貼一部」。
KC又話，另一主打每日優惠產品係19吋電腦芒，劈價三成三賣$599，總共賣700部。但講到蝕得最勁嘅係42吋高清電視機，由現價賣$6,999元，減價至$3,999，減幅43%，「唔使4,000蚊買到42吋高清電視機，業委會蝕到入肉，所以總數只得20部」。其他優惠有一折賣29蚊嘅飛利浦電腦喇叭。
KC提醒消費者，購買優惠產品需在高登商場正門排隊攞籌，預計入場人次會超過對上一次腦場電腦節嘅56萬人次。
電郵：mailto:[email protected]