眨吓眼又一年，國寶大熊貓盈盈、樂樂5歲生日快樂！海洋公園噚日幫佢哋搞生日會，兩位國寶各獲一個冰雕鮮果蛋糕，唔使爭，可以慢慢嘆。海洋公園又邀請咗幾個噚日同樣係5歲生日嘅小朋友一齊慶祝，搞到盈盈、樂樂鬼咁high，碌地爬樹樣樣做齊，引到現場市民影唔停。
講開又講，上年盈盈、樂樂生日，海洋公園已經吹晒風話呢對小情侶感情好到打風都打唔甩，隨時有BB，但等咗成年都未有好消息，唔通盈盈樂樂同香港年輕夫婦一樣，都崇尚「無孩生活」？海洋公園動物及教育總監吳守堅話，盈盈嘅身體機能其實已經成熟，可以做媽咪，但由於雄性大熊貓一般較遲熟，到5至7歲先開始對女仔有興趣，所以幾時行埋仲要等吓。
至於多年無所出嘅安安、佳佳，唔講唔知，佳佳原來已經32歲，相等於人類103歲，係喺圈養環境下全球第三位年長嘅大熊貓。最老嗰隻37歲，喺四川，如果佳佳身體冇大礙，仲有望打破紀錄呢！八方希望盈盈、樂樂早日得B，否則唔只香港人有人口老化問題，住喺香港嘅大熊貓老化埋就慘啦！