碧咸因傷冇份踢世界盃，但佢嘅專業精神至今仍然受到好多球員同球迷敬重；佢仲希望參加兩年後嘅歐國盃決賽周，證明佢對自己嘅體格相當有信心，就連洛杉磯銀河教練艾連拿都話，碧咸隨時可以踢到45歲先至收山都得！
教練讚體格強健
碧咸目前效力銀河，但佢上季決定再赴AC米蘭，喺意甲角逐，顯示佢對現時身體狀況信心十足，認為有足夠能力應付歐洲頂級聯賽，而受傷只係一時意外，並唔係因為碧咸喺意甲應付唔嚟。
現時已經返回銀河嘅碧咸，好期待再次為球隊比賽嘅日子來臨，而教練艾連拿對呢位前英格蘭國家隊隊長嘅狀態讚不絕口，話以「金丸子」嘅體格，踢到45歲先宣佈掛靴都冇問題！其實講真，碧咸有型又有款，家都唔使靠踢波搵食啦，所以佢嘅永不言退精神，的確好難得。
喺世界2、3線聯賽角逐，球員超過40歲仲可以馳騁絕對唔係冇可能，好似曾經係日本國寶嘅三浦知良，日前就喺日乙幫FC橫濱入波，以43歲5個月之齡，打破咗聯賽最年長球員入波紀錄，可謂有辦你睇；所以，體能底子更強嘅碧咸要踢到45歲，都咪話唔得！
話時話，「金丸子」自從3月受傷後，已經差不多半年冇比賽，休戰期間陪囝囝睇《反斗奇兵3》之餘，當然心思思希望盡快復出；有傳佢想下個月再披銀河戰衣，鬥心之強真係唔到你唔服。
其實，碧咸喺上周六銀河友賽佢昔日效力過嘅皇馬時亦有到場，仲同「C7」基斯坦奴朗拿度有講有笑；假如碧咸唔係受傷唔能夠出場，相信呢場友賽會更加哄動，銀河亦可能唔使輸2:3。