日前睇地產論壇張一鳴個專欄，佢講睇報紙見到風之后李麗珊都斥千萬買樓投資，就覺得有啲擔心，唔係小覷風之后嘅投資眼光，只係因為李麗珊並唔係物業投資常客。的確，如果連並唔算活躍嘅投資者都逐漸浮現時，可能係一個另類啟示。
黃建業套股買樓
就好似股壇前輩成日講，股市跌後回升，猶有餘悸嘅散戶認為只係「迴光返照」，唔敢入市，到升近見頂先「確認」升勢，到時先追入。不過，同樣嚟自市場嘅啟示，敏妮仲留意到另一則新聞。就係美聯物業老闆黃建業近期又再「套股買樓」，用兩億幾銀，喺大埔買舖。
睇番啲舊剪報，黃老闆喺07年10月時，就配售自己持有嘅美聯股份，之後將啲錢用嚟買商舖。黃老闆係地產代理，對樓市應該好掌握，就算要為樓市造勢，都唔使自掏腰包，真金白銀買樓，佢家陣入市買物業，即係睇好樓價仲有得升！
睇番往績，07年嗰次佢套股賣樓時，股市差唔多見頂，08年積極放售喺07年買入嘅物業，賺到唔少兼贏埋眼光，根據中原城市領先指數，當時樓市仲係升緊，但到08年中樓市見頂回落，真係沽遲啲都由賺變蝕。除咗沽售股票、投資物業嘅時機睇得準，黃老闆減持物業嘅時機亦掌握得好耍家。
一個係非活躍投資者，一個係資深炒家，都喺呢個時候入市，唔同嘅係一個買豪宅，一個買舖，有心想買樓嘅跟唔跟追入呢？敏妮始終都係揀有往績嘅嚟跟，但唔係跟家陣高追，換另一個角度，既然資深炒家入市，當然會有沽出獲利嘅一刻，信佢眼光好，佢沽出時即係大市見頂時，到時睇定入市都唔遲。
溫敏妮
http://wanmanli.com/blogs/