民主女神入中大那晚，中大學生會會長黎恩灝Eric拿着咪高峯唱學生會會歌，歌聲動不動聽無人理會，就像在維園唱《自由花》，大家只在乎有「拆拆哋」的聲音襯底。但原來唱歌是Eric強項，唱K心水是楊千嬅早期歌曲。「女聲嚟o架喎，你點唱呀？」「有合唱o架嘛。」「！」「同埋平時我唱拉丁歌都係唱高音o架啦。」「拉．丁．歌？」
「嗰晚心情好激動，膽怯就冇，每個上得學生會莊嘅人都試過嗌咪，所以唔會驚。嗰晚去到有個老鬼走埋嚟，喂！唱吓學生會歌啦，咁我哋咪唱囉。」
「驚講錯嘢影衰學生會」
今年六四晚上，2,000師生護民女，火車站對出草地上是黑壓壓的人頭，不少校友都驚嘆盛況空前，其實在事發前一個月，中大對六四悼念活動的反應還是冷冷清清。那時學生會把高智活新作品《民主的碎片》放在文化廣場，一邊播放《自由花》，同場舉辦圖片展，現場只有黎恩灝穿上六四Tee嗌咪，周圍小貓三、四隻，旁邊內地來港學生會的攤位成員，半眼也沒有看他一眼。
不過是數星期時間，一切翻天覆地改變，Eric說，過去這段日子壓力很大，「好夜瞓，但又唔可以晏起身，有乜發生要即時回應，電台節目又要一朝早，頻頻出去做訪問，令自己好頻撲，又好怕講錯嘢，好驚講咗啲嘢好低層次，人哋覺得太簡單，阿媽係女人咁，會影衰學生會。」
五區公投、大專2012參選、民主女神像入中大、政改包圍立法會，一連串的事，Eric上莊前想也沒想過，「係上年10月搞菜園村，先發現自己需要有個平台去做啲嘢，學生會正好係一個了解社會議題、深化討論嘅地方，但係上咗莊先發現好多突發事要處理，突然間爆一件事出嚟，得一晚時間安排，身心都好攰」。
雖然忙到「甩轆」，但今個學期GPA仍過3。Eric是虔誠天主教教徒，在彌撒中擔任司琴及指揮，很多人覺得念政治及公共行政的他長得像他老師蔡子強，記者卻覺得他是「正義版技安」，只是沒有開演唱會，也沒有逼朋友仔聽他獻技，他每個星期都唱，是歌詠團中堅，唱的是非一般的彌撒曲。
踏上社運之路全因樞機
Eric在中學時代首次接觸傳統拉丁文彌撒，被額我略歌曲吸引，開始學拉丁文，從此每周一次穿上長袍在彌撒中唱歌，溫文爾雅。在中大，他選讀拉丁文，上學生會莊，卡片上也印着「NonMinistrarisedMinistrare」一句拉丁語，意思是「非以役人，乃役於人」。
黎恩灝說，踏上社運之路，跟教會和陳日君樞機有很大關係，第一次遊行就是02年在堂區組織下反23條，陳日君與當年保安局局長葉劉淑儀舌戰令他印象最深，「樞機講嘅嘢令我覺得，信仰唔淨係講祈禱、靈修，要有番社會幅度，信仰係要擺落生活，樞機做到呢個榜樣」。
畢業後，他希望繼續念書、從事學術研究，「我唔係想做乜嘢出位嘅人，成日提醒自己要好似樞機咁有服務嘅心，呢樣嘢到呢一刻都覺得好有用。」
記者 張嘉雯