章子怡由去年底開始是非纏身，接連出現被潑墨、詐捐同男友ViviNevo分手等負面新聞，形象跌到谷底，所以近幾個月見佢好似多咗做一啲公益事務，唔知係咪想挽回公眾形象？噚日中華紅絲帶夏令營喺北京奧運鳥巢開營，跳水王子田亮同章子怡以形象大使嘅身份陪住100名愛滋病孤兒遊覽鳥巢。
乾曬兩個鐘
主辦單位話以前係好難可以請得到章子怡嚟呢啲活動，今次佢可以分文不收過嚟，仲肯陪小朋友去遊鳥巢，仲話有時間會陪小孩子一齊去遊長城，搞到成班小朋友好感動。噚日北京好熱，達攝氏31度，章子怡着住高踭鞋，足足曬咗兩個鐘，後來頂唔順，佢都問主辦單位借咗頂帽嚟戴，不過做完個活動，見佢身上啲衫都俾汗水搞到濕晒！
章子怡近來剛同郭富城拍完《魔術時代》，佢話：「在劇組我跟很多愛滋病患者共同吃飯，共同生活，對愛滋病患有更深的體會，我絕對不會歧視他們。」
