日本實試艇仔　雙眼上額內心寧靜

剛受邀到日本，落Track體驗日產一堆新科技及新車，餘興節目係幾架熱賣車款任揸任試，喺橫濱市內作實戰體驗。當中包括最新「艇仔Juke」，外形寸爆搶眼之餘，市區內疾飆緩急有致，1,500cc偈有力之餘，原來仲好寧靜。

記者、攝影：徐影龍

橫濱飛馳穩定紮實

今趟日本之旅，重頭戲是InfinitiHybrid、最新March同Elgrand等，但前菜亦不俗，一堆熱賣車款如Fairlady370Z開篷及棍波版、Cube、Note及Roox等。不過全球傳媒爭住試的，肯定是剛推出的城市SUVJuke。呢架外形寸爆、對眼生喺「額頭」的Juke，用艇仔Juke形容，除因車上設備齊料、操控具玩味外，試車時撞正橫風橫雨，揸住佢喺橫濱市內飛翔，有種於大海中冒險的刺激感。好玩之餘，車架紮實及懸掛穩定，濕地轉向令人相當安心。而下雨天車身高有更大好處，就是前方視野更遠更廣，就算在人生路不熟的雨中「航行」依然安全。

■上半身玩流線Coupé格，下身就變番筋肉SUV，夾得出奇地好睇。

■魚勾尾燈勁似370Z，襯落「尾股」勁有氣勢。

內櫳顏色任襯

早前到港的水貨屬最齋入門級，且黑身黑櫳超級大路，有啲悶。今次橫濱實試的型號就交足功課，白、銀、灰車身任揀，部份仲配埋廠方重點宣傳嘅金屬紅內櫳，原來未必跟番車身顏色，未來行貨到港的話，訂車時不妨預早同代理傾傾點襯色。
話佢齊料，全因有晒多媒體LCD、GPS導航、內置硬碟等設備，下方仲有一個細芒，顯示扭力輸出情況，等你唔會嘥油狂踩。唯一可惜的，是幾部Juke全屬1.5LNA偈型號，未能一嘗Turbo版的瘋狂，但勝在引擎更寧靜慳油，車廂隔音亦不俗，於區內遊走，相當舒服無壓力。