記得睇到《大盜五右衞門》的預告片時，最吸引觀眾的一定係靚絕嘅CG，加上超強嘅日本演員卡士，真係極有吸引力，仲以為睇緊真人版《戰國無雙》，機迷至愛！
記者：許福合
神秘的盒子
好多人睇《大盜五右衞門》都係為咗捧江口洋介同廣末涼子嘅場，不過若果你對日本戰國有一定認識，尤其武將們嘅恩怨，就會更加有趣，就好似睇《三國誌》一樣。當中出現嘅傳奇大盜五右衞門，就係一名俠盜，劫富濟貧，有一次五右衞門發現了一個神秘的盒子，當中據講藏着有關暗殺織田信長的重大秘密，因而被各路強豪搶奪。雖然細節與史實有出入，但整體故事還算不俗，後半部略嫌有啲混亂，但勝在有多場戰鬥可欣賞。
機迷過癮
雖然江口和廣末的確有條感情線，不過前半段鋪排太長，但後半又講得唔多，變成兩人感情若有還無，不過主線無離開日本動漫常用嘅主角要變強，保護最重要的人呢招。《大盜五右衞門》同期會有Blu-ray同DVD碟，我就建議最好睇Blu-ray，事關呢套劇重點都係特效同CG上，從宏大城市場景、打鬥畫面，甚至後段嘅戰爭，都有電玩味濃嘅CG特效，對睇慣荷李活電影有另類觀感。整體上打鬥場面特效做得較好，雖然主角們可以飛來飛去，有啲唔現實，但部份橫向移動畫面，真係好似打緊機一樣，機迷睇落真係幾過癮。
Lomo畫面
部份場景畫面，就明顯假假哋，甚至睇落有畫出來嘅感覺，如背景有大量士兵做佈景，就相當死板，據講係因為部份畫面只係用上演員的臉，再在電腦上合成製作，加上用上高飽和度同黑白對比，效果有啲似影Lomo相一樣。聲音方面，環迴音效位置效果相當唔錯，飛鏢、刀劍亂飛嘅場面，都可聽出明顯方向感。另外要提係配音，雖然Blu-ray同DVD都有廣東話同國語配音，不過配音質素就真係幾一般，我都係用日語原聲加字幕好過喇！
Blu-ray$169
DVD$89