香港作為國際都會，今時今日卻只得兩間免費電視台，確實匪夷所思。無綫一台獨大多年，積弱亞視連番易主地震連連，早向友台慣性收視扯白旗，所以「CCTVB」的製作涉全抄宴也好、炒冷飯也好，觀眾根本零選擇。不過隨着城市電訊、有線寬頻及電訊盈科起錨，分別向廣管局申請免費電視牌照後，本地電視業有望打破無綫壟斷局面，於明年誕生第三、第四甚至第五個免費電視台，隨時變成五雄爭霸。電視革命能否開闢一片天，五位資深電視人各有意見，但一致通過：砌無綫。 撰文：葉雪、何永寧
蕭若元：反TVB壟斷
第三間或更多免費電視台有望於明年登場，蕭若元舉腳贊成之餘，更狠辣建議必須打壓CCTVB，削其勢滅其威，蕭若元說：「政府應該發更多digital牌，唔發根本講唔過去，最重要係政府除咗發牌外，要抑制TVB利用資本性地位欺壓其他電視台，呢啲喺外國經常都有，避免壟斷性，譬如唔准所有電視台擁有長期藝員，藝員永遠都係部頭，咁TVB就唔能夠壓迫人，政府係需要採取行動矯正。」
「港府要有配套」
蕭若元續說：「我梗係贊成有新嘅免費電視台，但要限制TVB，港府要有配套性設施，譬如無綫喺黃金時段唔准播劇集。我會繼續畀壓力，聯名要求廣管局制裁TVB，點解香港唔可以咁做？外國都有咁做o架，跟住就去立法會嘈，非達到目的誓不罷休。譬如藝人要自由身，你呢度做完一部戲咪過亞視做囉，尤其一間電視台擁有百分之九十嘅藝員，一定要咁抑壓佢至得，香港嘅電視業先會有競爭。」
TVB一台獨大多年，蕭若元直斥是非常不健康的電視現象：「因為你放縱佢，無綫利用開台頭五年建立支配性地位，然後壓迫其他人，於是咪有更高嘅收視率，呢個係惡性循環，真係要打破先得。」
蔡和平：防色情氾濫
對於政府準備多發兩至三個免費電視牌照，蔡和平表示對觀眾是好事，因為可以有更多選擇。但作為資深電視人，他有另一層深思，他說：「雖然我冇份投呢個電視牌，我都睇過個投牌內容，相對嚟講係太寬鬆。令到電視台為咗競爭，製作出啲唔夠水準嘅節目，因為要慳錢。」
蔡和平覺得假如發牌條例不收緊，電視就會像目前一樣，充斥着以販賣低級趣味為主的節目，他帶點欷歔說：「收費電視可以寬鬆啲，因為佢嘅觀眾有得選擇睇同唔睇。相反免費電視嘅層面太廣，好易影響下一代。」他又不點名批評部份節目：「好似喺度教人煮餸，你喺度鬧鬧鬧，啲下一代會覺得：『原來鬧人都好正常』，一個唔好嘅觀念，成為一種風氣。」
忽略社會責任
蔡和平認為條例應該規範電視台，製作多一點社會文化的節目，不要再讓電視氾濫色情，他說：「現今嘅電視人只顧rating（收視）同金錢，忽略咗電視應有嘅社會責任，更加忽略咗創意。」
鄧特希：戥亞視可悲
從事電視業近30年的鄧特希，指無綫一台獨大多年，直接影響行業生態，他說：「呢個現象持續太耐，觀眾已經習慣唔去選擇，同埋冇得揀，基本上得一個台製作，其他電視台嘅製作好零散或者偶然先有製作。家又資訊發達，大家透過唔同途徑都睇到外購節目，當其他台播外購節目時，其實好多觀眾已經睇過，根本都唔感興趣。我唔係想踩亞視，但好似亞視過去嘅製作、新聞，令大家對呢個台有唔係咁正面嘅睇法，從來唔會㩒遙控，呢個現象對營運者幾可悲。」
若有新免費電視台開辦，鄧特希認為必定是好事：「我梗係贊成有，市場有更多選擇，對觀眾、製作人都一定係好事。好似政府有啲基金畀從事電影行業嘅人拍電影，都有出色作品，好似《歲月神偷》，政府喺呢方面對免費電視台有啲優惠，令佢哋嘅經營環境比較理想，都已經幫好多。」
香港難搵食
不過新免費電視台卻欠台前幕後人才，尤其當紅藝員都被無綫綁死，鄧特希無奈說：「簽約係個人志願，冇人強迫，但幕後人員除咗幫呢個電視台打工都冇其他機會，我有啲朋友早排俾亞視裁員後，真係冇辦法喺本地搵相關工作，係俾香港咁唔健康嘅電視行業生態造成。」
黎文卓：觀眾漸流失
黎文卓認為多幾間電視台成立，對打工仔而言實屬好事，因為可提高就業率。黎文卓說：「多幾個平台，對電視從業員係好事，可以提供更多就業機會。」問他可覺得現時無綫一台獨大情況不健康？他說：「係節目質素令到觀眾流失，從呢點去睇唔係太好，搞到睇電視嘅人越嚟越少。講真，呢幾年我都唔睇香港嘅主流電視台。」
競爭添危機感
問黎文卓可覺得電視抄襲風氣太盛？他說：「我覺得抄唔緊要，因為天下文章一大抄，但應該多元化，抄得嚟要有深度，要有番香港人嘅特色。」
黎文卓寄望未來新電視台揸弗人將目光放遠一點，作長線投資，他說：「家電視台比較急功、要即食，唔肯花太長時間去製作一個節目，今日做聽日出街就最好，令到節目質素下降，呢個亦都係電視出現嘅危機。好似亞視《尋找他鄉的故事》咁，初初出街都冇人知道，但做做吓就越嚟越多人講，港台《鏗鏘集》都係拍好多年，做呢啲節目要花好多時間，最緊要老闆們肯投資。」
黎文卓認為，新電視台的成立，可給予現時主流電視台一個危機感，讓他們積極進取一點，從而提高節目質素。
丘亞葵：反正都係抄
香港能再多三間電視台成立，丘亞葵認為無疑是百花齊放，但以電視業現時前景來看，將要走一條相當艱難的道路。丘亞葵說：「電視台收入來源係靠廣告，但香港嘅廣告額好細，如果因應香港廣告市場嚟睇，電視台係好難做。加上電視台播廣東話，啲節目好難賣埠，走唔出乜嘢地方。」
欠創意人才
談到電視人才方面又是否足夠時，丘亞葵說：「講到人才方面就一定唔夠，以前無論綜藝節目或者劇集，都會有好多好出色好有創意嘅作品，尤其是80年代，但以前做開嗰班電視人已經年紀大，家又唔見有邊啲特別標青，加上家好多時都係側埋一邊，電視台（指無綫）有慣性收視，喺冇競爭、冇對手，以及唔肯落本嘅情況下，又點會有進步？今日香港嘅電視行業其實係退步，以前廣東電視台製作好簡陋，但家已經拋離咗香港，無論話劇或者綜藝節目，抑或由劇本到製作，都比香港進步。」
丘亞葵認為，新電視台也許有一、兩個節目可以取得成功，但要徹底成功，定要花上五、六年時間。丘亞葵又寸經常抄襲的無綫說：「其實電視台請繙譯得啦，唔使請編劇，因為反正都係抄之嘛！」