香港上星期已經賣緊iPhone4，但「3香港」噚日俾電訊管理局翻舊賬。3香港去年8月喺七份本地報紙（唔包括《蘋果》），同一本雜誌落廣告，硬銷佢哋嘅iPhone套餐。個廣告話，客戶只需畀月費398元，就可以零機價出機，又話32GB與16GB版iPhone3GS同步登場。
電訊局收到有業界人士投訴廣告誤導後展開調查，認為3香港冇喺廣告講清楚，月費398元只係適用於16GB，如果買32GB月費係要780元，價錢貴好多。廣告又唔寫明客戶要一次過預繳4,680元，兼且綑綁式簽約24個月，仲要喺指定月費之外，每月畀多36元訂用指定增值服務。局方裁定廣告內容有誤導成份，罰10萬大元。