小妹噚日深入男人重地高級視聽展，想了解吓點解一條喇叭線，令男士咁興奮。喺大昌showroom班男人為咗個「波霸」如癡如醉，當然唔係周秀娜連視聽展都踩場，而係法國Cabasse喇叭LaSphere，因球體外形被暱稱「波霸喇叭」，賣成140萬，貴絕全場。
球形設計避低頻振動
Cabasse負責人Christophe話，LaSphere係4路同軸揚聲器，將單元放置在同一軸上，以同一音源重現低中頻、中頻與高頻，並凝聚直接與反射聲音，還原聲音喺錄音時嘅全部細節。球形設計可避免低頻振動，低音更清晰，而防震腳設計，亦可以擴散送走多餘諧震。小妹即場試聽過波霸嘅威力，好有壓迫感（我講耳膜），人聲好清晰，高音都好靚。
另一展商Miro推介英國Vision透聲投影幕，以前130吋要賣10幾萬，家3萬有交易。Miro負責人話，將喇叭放喺透聲幕後面，可以慳好多位，而聲音可穿過幕上細孔，Vision嘅幕經THX認證，聲音失真只有1%。
小妹最愛膽機，聲望音響嘅Edward話，膽機播放嘅音樂最似原音，最自然，聽得耐都唔會攰，其中日本Kondo最新頂級膽機，用自家製電溶、電阻、純銀線。小妹試聽過好似現場演奏，感受到高音甜、中音準、低音勁滋味，但價錢更勁，前級23萬，後級70萬。
高級視聽展噚日至聽日喺灣仔會展3號展廳舉行，入場費60蚊，仲附送一隻收錄發燒友鍾情靚歌嘅SACD。
電郵：mailto:[email protected]