攝影唔單止係興趣，仲可以宣揚大愛。本地攝影家鍾仁偉，幾十年來遊歷世界各地，擅長捕捉自然生態、花鳥走獸的珍貴鏡頭。今個月13至16日，佢會舉行首次個人攝影展「Moments……生命的點滴」，展出近50幅作品，仲會即場義賣，得益全數捐畀靈實寧養院。八方睇過其中幾幅作品，確實觸動人心，靜謐中帶幾分靈氣。
其實鍾仁偉來頭唔細，佢係已故「工廈大王」怡華集團創辦人鍾江海個仔，本身亦係上市公司華廈置業嘅執行董事。佢話最欣賞靈實協會對生命嘅尊重，希望今次義賣可以幫到啲長期病患者同末期癌症病人。攝影展將於奧海城二期舉行，到時大會仲邀請歌星李克勤任主禮嘉賓。