如果無綫覺得香港先生選舉只有女人想睇，咁就真係超錯！香港先生05年首播以來，只設女評判，現場觀眾清一色係女人，男人統統被拒諸門外，要自己匿埋喺屋企睇電視，好鬼慘。愛護家庭家長協會嘅成員同八方講，身邊起碼有10位男性朋友想入場睇港男，親眼見證香港先生誕生，但係年年問無綫攞飛都撲空，令佢好氣餒。
賣弄身材有侮辱之嫌
話說回來，香港先生前兩年播出後廣管局都收到唔少投訴，08年有54宗，去年有9宗，主要都係批評節目意識不良、品味cheap同歧視男人。香港男士關注組成員王先生都話，香港先生過份賣弄參賽者身材，有侮辱男性之嫌，質疑「點解港姐就美貌與智慧並重，港男就身材大於一切」。
根據過往慣例，參賽者喺泳裝環節必會着住一條短無可短嘅三角泳褲，用水柱搞到成身濕晒之後，走向一眾女評判前大騷肌肉，任摸唔嬲。王先生最睇唔過眼就係呢幕：「班港男做埋晒啲無謂嘅挑逗動作，係咁俾人摸，如果我個仔問我：『爸爸，男人係唔係要咁做o架？』我都唔知點答！」佢強調，選港男冇問題，有問題嘅只係某啲內容，「睇過有港男表演跳舞，都真係跳得好好」。
今屆香港先生決賽會喺今個月21號晚舉行，香港男士關注組、平等公義協會同埋愛護家庭家長協會，噚日一齊踩上廣管局，投訴節目內容不雅，兼違反兩性平等原則。團體代表同廣管局主席何沛謙傾咗成粒鐘，結果得個桔。廣管局話，要投訴節目違反兩性平等原則應該去搵平等機會委員會，唔應該煩佢，仲力撐香港先生係「輕鬆、大眾化」嘅節目。
無綫話睇電視係參與
無綫則回應話，香港先生被投訴都唔係一朝一夕嘅事，好明白大眾嘅顧慮，所以今年會有戶外直播，到時男又好、女又好，可以一齊睇大電視，但係現場觀眾仍只限女性。咁嘅安排同今年7月余曾辯論、曾蔭權話市民睇電視已經有觀眾參與嘅言論有乜分別？睇嚟事旦男要做多個紙牌，抗議香港先生CCTV化。