近嚟跳船嘅政務官越來越多，好多人都話係頂唔順官場文化。八方同一個資深政務官傾起，佢都話親身經歷過唔少上司，唔止做得差，更加係缺德，有錯唔改，仲要人哋跟住錯先至得。
佢話出道時，上司已經教佢做官最緊要唔好講一個字──就係why，即係點解。佢反問上司唔識點解唔問，做咗之後想做得更好又點解唔問，但上司唔睬佢。
唔准揭穿買貴咗
另一次佢見張聖誕卡嘅設計好舊，製作費又多，於是去搵人打價同設計，做咗一張又平又靚嘅新卡，上司話唔可以改，佢走去問另一個更高級嘅話事人，結果被採納。上司又搵佢講，雖然改用新卡，但價錢唔可以收得比之前個平，暗示會揭穿佢之前買咗貴貨。
官場中又有啲人鍾意使死人，有高官話，官場有幾個人出晒名，頭箍小姐係其中經典，就算只係出席一啲小型場合，都要班下屬幫佢做定好多資料，去立法會就更加要做幾十到百幾條QA，其實好多都係簡單到極。高官話，佢遇過有個上司聰明好多，下屬話做咗幾十條QA要交畀佢過目，高官回答話，我唔睇呢幾十條，你畀我睇你搵唔到答案嗰啲題目就得嘞。