摑警察都可以甩難，攣變直、直變攣自然都不算天下奇聞。奇就奇在許鞍華（Ann）新作《得閒炒飯》明知題材危險和前衞，都有老闆肯投資，再奇的是王晶居然是老闆。更難想到的還有息影多年的周慧敏（Vivian）復出之作可以如此大膽。當年一襲爆衣宮廷服，已經成為宅男的集體回憶，今次再接再厲的豹紋睡衣，將會是另一番高潮所在。阿Ann強調賣的不是色情，希望借情慾戲來探討兩性問題，男男女女的情愛雖然深，但點深都不及《潛行凶間》吧。
撰文：張俊銘、魯萍
《得閒炒飯》上映日期：8月26日
吳君如在《得閒炒飯》中破天荒飾演雙性戀者，周旋於丈夫張兆輝和同性情人周慧敏之間。《得》片劇本是許鞍華的多年構思，Ann指這故事對她來說很有意思，但多年來也找不到投資者，最後得到王晶幫助，此片才能面世，Ann不忘為王晶平反，她日前接受訪問說：「啲人成日以為佢淨係拍商業片屎尿屁，其實佢對電影業好有心，《天水圍》系列都係晶哥打本投資，唔係佢呢部片點會開得成。」王晶成為許鞍華的白武士。
《得》片有頗多描寫女同性戀者的情節，講到明沒有內地巿場支持，Ann明知電影前衞和危險，但仍然堅持，她說：「我唔識得巿場管理，只識得做好自己工作，有老闆肯投資當然高興，我唔係唔關心部戲嘅成績，我好認同劇本表達嘅意識，所以堅持去做。兩個女仔相戀，我唔會當係同性戀，係真性情嘅表現。」
「我其實一額汗」
Ann指《得》片故事圍繞女性遇上不同對象，顯示出真假愛情，對男性來說有點不公平，因為這部是講述女人的電影，她謂能拍此片令她非常滿足：「我拍親都係師奶片，未拍過呢類電影，我其實暗地裏一額汗，因為題材危險前衞，可能有啲人會唔鍾意，仲未諗到觀眾睇到部戲個反應會係點。」感情愛慾關係，在台灣用語「炒飯」意思是指發生性關係，Ann指如此有意思的戲名是由王晶命名。
Ann起初籌拍《得》片，已決定找吳君如演繹一個已為人母的雙性戀角色，她表示之前未有機會與君如合作，但要找一個能演活這角色的大明星，她第一時間便想起君如，Ann說：「其後同君如一齊諗搵邊個做另一個同性戀角色，我哋都諗到搵周慧敏，因為角色外形同年紀都同Vivian相似。Vivian淡出娛樂圈一段時間，初時擔心佢唔願拍戲，但佢睇完劇本再約出嚟傾，佢只要求改少少對白就接個角色，我梗係話OK，佢都知道有親熱鏡頭，而且Vivian都想同君如合作。」
君如盼問鼎影后
飾演雙性戀者的君如同場接受訪問，指自己所演的是非一般角色：「齣戲唔係將焦點放喺同性戀，反而係交代冇男友、冇老公嘅社會問題，但唔係說教，亦唔係標籤雙性、同性戀。」她續說：「我喺戲中識好多嘢，跳舞、游水、扮靚，精神上唔使依賴人，但係周身刀冇把利，角色同我有幾分相似。」君如的角色感情生活複雜，萬綺雯飾演其舊女友、谷祖琳與她玩一夜情、張兆輝則是其老公。
縱橫影壇多年，卻是首次跟許鞍華合作，君如說：「唯一合作係喺《江湖告急》同場演出，佢唔算係多產，但部部戲女人都會攞獎，唔知有冇咁嘅機會。」失落去屆金像獎，君如自然希望這趟下回一城。
首次合作似老友
對於同樣首次合作的周慧敏，君如自言兩人認識多年，君如說：「Vivian間中會講吓佢哋兩個嘅甜蜜事情。」她透露與Vivian雖然首次合作，但相處得像老友：「頭幾日開工，Vivian話好唔習慣，我都不斷關心佢，熱身完10日，我哋就拍接吻戲，佢仲話好期待。」
片中君如與Vivian有多場親熱戲，當中不乏愛撫及親嘴，君如說：「其中一場講我同Vivian攬住咀，劇情發生喺屋企，感覺好放鬆同享受，但我哋唔係拍到《色，戒》咁。」君如的雙性戀角色情路崎嶇，但角色嚮往自在生活，自得其樂，她說：「個角色有我嘅影子，但我冇佢咁勇敢，因為我始終有個屋企。」
周慧敏、君如激吻互吞唇膏
周慧敏久休復出，當年的玉女掌門人不再純情，改玩激情和雙性戀，激吻吳君如又床戰陳偉霆，43歲之齡兼成為倪太才玩突破，難得拍檔吳君如沒有嫌棄，還抬舉她穿豹紋吊帶睡衣令自己噴血。
導演阿Ann擔心觀眾不夠喉，再有幾場接吻戲，事發地點有辦公室和升降機，當然床戲也少不免。為加強吸引力，導演刻意安排Vivian穿吊帶睡衣及與君如共浴。談到火辣辣咀戲，Vivian說：「第一場咀，冇諗過喺office場戲要錫，不過現場大家覺得有需要，反而印象最深刻係升降機入面嗰場，因為有準備，出嚟效果好啲，我哋做咗唔同版本。」
君如說得更直接：「始終係拍戲，好多人望住，好似同男人錫一樣都係咁冇乜嘢，我只係擔心佢咁耐冇拍戲，唔想對手有唔舒服感覺，我哋咀得好激烈o架，食晒大家啲唇膏，好深入，好似收貴利（脷叠脷）。」
當作最後一部戲
久休復出一來就如此激烈，Vivian直言因為欣賞許鞍華和吳君如，她說：「我好鍾意好欣賞Ann，對手係吳君如都係一個好大因素，我拍戲從來冇禁忌，拍呢部戲只係想對手信任我，感覺舒服。我覺得應該放低自己，做個專業嘅好演員，唔知呢部係咪最後一次o架嘛。」
故事簡介：大肚同志重燃愛火
《得閒炒飯》劇情講述吳君如和周慧敏飾演的一對雙性戀人，分手多年後竟在「母親的抉擇」中重遇，年輕時的浪漫回憶湧現眼前，兩人決定再走在一起。圍繞在她們身邊的是兩個令她們意外懷孕的男人──一個被老婆控告虐妻的男人（張兆輝飾）及一個仍在大學念書的小子（陳偉霆飾）。四人打破男女框框的兩性關係，引發出錯中有愛的喜劇場面。電影片名來自台灣男女的流行用語，當兩人情投意合要發生關係便是「炒飯」的時候了。
