花旗股市日前升破10600後，走勢相當飄忽，不過大勢仲係炒上，雖然市場上好淡消息都有，但係大戶好似傾向推高指數，短線可以睇好啲，不過道指家喺10680，距離11000關已經好近，相信投資者入市態度會審慎。
港股噚日繼續窄幅橫行，冇乜方向感，恒指反反覆覆升咗1點收市，大家都喺度等新消息，成交冇大變化，暫時係個別炒作。
上石化C輪23458：上石化（338）噚日報收3.29元，升1.2%。股價早前炒上3元樓上，在250日線橫行兩個禮拜，前日挾大成交抽高，噚日現陀螺，係整固再炒格局，破3.60元睇3.80元，可以諗吓隻C輪23458。
隻輪現價31仙，2011年1月21日到期，行使價3.48元，溢價15.2%，引伸波幅42.9%，槓桿率10.6倍（有效5.2倍），正股見3.80元，23458睇60.8仙，正股跌穿3.13元就沽咗隻輪。
俊樺