南韓體壇嘅地位喺世界越嚟越受到重視，刷新女子個人花樣滑冰世界紀錄嘅「冰上女王」金妍兒，便獲洛杉磯市議會予以頂級嘅嘉許，將明日（8日7日）定為「金妍兒日」（Yu-NaKimDay），真係威過南韓所有體壇明星，簡直可以「升呢」成為「QueenofKorea」啦！
19歲嘅金妍兒喺今年2月底嘅溫哥華冬季奧運嘅女子個人花樣滑冰賽，分別在自由滑、短節目都打破世績，終以228.56分嘅新世績勇奪金牌。贏得「QueenYu-Na」雅號嘅佢人氣瞬間喺全球急升，亦令佢成為廣告商嘅新寵兒；之不過講到最威水嘅，都係喺獲得美國洛杉磯市議會嘅肯定，擁有以自己名字命名嘅「節日」。
市議會嘉許惹爭議
之但係以金妍兒個名嚟命名「節日」都引起咗傳媒嘅少少爭議，皆因金妍兒與美國可謂大纜都扯唔埋，亦都無對洛杉磯市有過咩貢獻，如果係講關係嘅話，最多佢只係長住喺同美國都係喺北美洲內嘅加拿大多倫多。我求大俠再睇番呢次幕後搞手，原來係市議員韋臣（HerbWesson）、拿邦治（TomLaBonge），佢哋嘅社區內都有大量嘅南韓移民，如果金妍兒做咗政治籌碼就唔係咁好啦！
而當洛杉磯市議會喺周二宣佈咗呢個消息之後，美籍韓裔領袖基金會（KoreanAmericanLeadershipFoundation）亦都唔執輸咁，宣佈話會頒發一個「韓人的驕傲」獎項（ProudKoreanAward）予金妍兒，特別之處係呢個組織本來只係表揚美籍韓裔嘅名人，照理南韓籍嘅金妍兒唔應該有獎，基金會發言人就話金妍兒近幾年嘅傑出表現，令到住喺美國嘅南韓移民好鬼自豪、驕傲，所以就決定頒個獎畀佢喎！
今抵洛城出席簽署儀式
我求大俠覺得就覺得呢個解釋真係兒戲咗啲，如果係咁嘅話，美籍韓裔嘅高爾夫球手魏聖美、英超曼聯嘅朴智星都好應該有獎，佢哋喺專項都有卓越成就喎！而金妍兒今日就會抵達洛杉磯出席簽署儀式，仲會同洛杉磯市長維拉里戈薩（AntonioVillaraigosa）會面，金妍兒仲會捐出佢嘅滑冰鞋㖭！
知多啲：「韓人的驕傲」06年設立
美國第2大城市洛杉磯約有12萬南韓移民居住，美籍韓裔領袖基金會（KoreanAmericanLeadershipFoundation）自06年起頒發「韓人的驕傲」獎項（ProudKoreanAward），今年金妍兒與80歲的前奧運跳水冠軍SammyLee齊獲獎，另外僅有獲獎者為華盛頓州參議會副代議長PaullShin、美國勞工部婦女局主管ChunShin-ae。