貴為全球身價最貴足球員嘅葡萄牙球星基斯坦奴朗拿度(C朗),憑佢型爆嘅笑容、健碩嘅肌肉贏得萬千少女嘅歡心,成為全球男男女女嘅偶像;之不過呢位身價8,000萬鎊嘅球星嘅偶像究竟係邊個?原來就係身處美國洛杉磯嘅巴西柔術(BrazilianJiuJitsu)大師萊斯(RoyceGracie),C朗日前仲同皇馬隊友卡卡,拜會萊斯跟佢學番幾招㖭!
與卡卡拜訪學兩招
25歲嘅C朗身邊女友如走馬燈成日轉就人所共知,查實佢亦都對巴西柔術極為着迷,今次佢拜會嘅萊斯來頭實在唔嘢少,皆因佢就係將巴西柔術發揚光大之人物,現年43歲嘅萊斯來自加拉斯(Gracie)家族,萊斯嘅伯父卡洛斯(CarlosGracie)曾隨日本柔道創始人嘅弟子前田光世學習,卡洛斯再將技藝教授畀萊斯嘅父親希里奧(HelioGracie),希里奧之後再將技術演化為現代巴西柔術,萊斯憑巴西柔術3次贏得終極格鬥錦標賽(UltimateFightingChampionship)嘅冠軍,C朗亦都話自少已收集有關萊斯嘅比賽錄影帶,故此佢呢次受到家喺洛杉磯開班授徒嘅萊斯邀請後,就二話不說與同樣有興趣嘅卡卡拜訪。
箍頸鎖喉學到足
C朗見到偶像當然興奮,仲即刻問萊斯點樣可以憑巴西柔術,對付身材比自己高大嘅對手,萊斯亦都好好教導C朗,C朗亦將箍頸、鎖喉等動作學到足!與萊斯同為巴西嘅同鄉卡卡,兩人亦都「雞啄唔斷」,大談身為職業運動員都應該要遠離煙、酒,卡卡仲笑話佢同萊斯都係「老一代嘅運動員」喎!
學藝完畢之後,卡卡、C朗之後仲同萊斯嘅兒子簽名、合照,萊斯嘅兒子都當C朗係偶像,合照時笑到四萬咁口。呢次C朗學巴西柔術增強自衞能力,係唔係避免成日「搶女」嘅「後遺症」,就不得而知啦!
知多啲
巴西柔術源於加拉斯家族將日本傳統柔術演變,創造一門新的格鬥術,故又稱加拉斯柔術(GracieJiu-Jitsu),特色為注重地面打鬥為主,適合身材矮小者應付高大對手,練習柔術者可以擊打等技巧制服對手。