鄉議局前晚喺九龍灣展貿為新大樓局址舉行電影籌款，成功籌到300萬元，主席發叔話成績幾理想，但大樓要1.6億元建築費，現在仲差成2,000萬元先埋到單，希望多啲熱心人士繼續支持。發叔話自己嘅朋友，幾乎捐得到嘅已經捐咗o架喇，希望稍後可以發掘更多人捐錢。
前晚首播嘅電影叫《諜海風雲》，周潤發同鞏俐主演。發叔早前話都想請身為南丫島原居民嘅發哥出席，不過好似佢唔喺香港，嚟唔到撐場。慣咗早瞓嘅發叔噚日唔介意捱眼瞓，大讚套戲好睇兼刺激。財爺鬍鬚曾同太太以及林鄭月娥都有捧場睇戲，算係畀足面。林鄭今日仲會出席鄉議局新大樓上樑儀式，證明佢尊重發叔。