大公司唔識得危機處理，後果可以好嚴重，八達通係最新樣辦。剛退休嘅消委會公共事務部首席主任蘇偉生見得多呢啲驚險場面，佢喺消委會74年成立初期已經加入，可以話係開荒牛，多年來同無數被投訴嘅大公司交手，發現好多公關危機都係自尋煩惱，「有啲公司本意唔係想呃個客，但唔識處理投訴，搞到個客咁嬲」。
退休一段短日子，蘇偉生靜極思動，透露想開公關公司做「拆彈」工作。佢做消委會多年，強項係幫大公司搞好客戶關係，「消費者需要乜嘢，我都算好清楚」。其實，蘇偉生年輕時已經識危機處理，越戰時佢做駐亞洲記者，有次喺越南軍營被流彈擊中，「第二日先搵醫生鉗番彈頭出嚟」。駐越南時識咗個女仔，去對方屋企，點知對方媽媽突然返嚟，個女仔叫佢爬騎樓走避。呢啲危機處理，唔係人人都試過。