政圈喺公投運動舉行前夕已經傳出消息，話社民連創黨主席黃毓民長子黃特漢喺大陸藏毒被補，最近消息終於獲得證實，商台節目《左右大局》噚日直接問咗毓民，佢個仔係咪喺大陸因為涉嫌藏毒被捕，毓民冇否認，只係話事件交咗畀佢老婆處理。至於阿仔係咪已經獲釋？毓民冇向商台證實，但係八方前日都有向毓民打探過，佢回應稱「件事已經解決咗」。
事發5.16投票前
社民連主席陶君行亦證實毓民有向佢提過呢單嘢，話個仔喺內地畀人捉咗，而且仲喺5.16補選投票之前。雖然毓民嗰時向阿陶以及另外兩位立法會議員透露過呢件事，但都冇講詳情。阿陶稱唔覺得毓民受呢件事影響，而喺五區公投運動中變得低調，因為如果中方有施壓，黨內每個人都有壓力。至於外傳毓民2012年唔選立法會，阿陶亦覺得同呢件事無關，因為毓民成日都係咁講，個仔安危不在考慮之列。
黃特漢04年在港都曾經捲入毒品案，承認藏大麻同管有吸食毒品工具，判感化15個月。