港、粵兩地網民齊撐粵語，以港式「煲冬瓜」揚威大江南北嘅藝人古天樂都撐埋一份。古仔舊年拍嘅輪胎廣告，憑一句「神者撚，撚鈦撚」（想節能，輪胎能）成功吸引網民注目，廣告收視爆燈，佢最近再接再厲，幫百事可樂喺內地拍咗輯新廣告，段片俾人擺埋上YouTube。
古仔喺新廣告嘅普通話水平，明顯有進步，45秒短片裏面見佢努力咬字，可惜網民唔多受落，有人話如果唔係睇字幕，一定唔知佢噏乜；有人覺得古仔講得咁辛苦，建議佢下次不如用番粵語仲自然。
不過，有網民就認為古仔係頂硬上，專登以港式煲冬瓜拍廣告，實行曲線撐粵語。講到尾廣告商先係大贏家，因為段片短短一日已經吸引到超過2.8萬人次瀏覽。睇片可到 http://www.youtube.com/user/LOVE1MINS#p/a/u/1/KoNypF0ILPQ