厭惡o靚模騎劫書展者大有人在，但大多數人「隻眼開、隻眼閉」；唱作人林一峰卻以實際的「罷簽」行動對抗書展o靚模化。「有啲嘢，錯到一個地步，唔講只會變本加厲」。公然反抗o靚模入侵書展的林一峰指「冷漠」是港人其中一項死症，就連反對的時候也未必會出聲，今次冒着成為「炮灰」的危險，無非要帶動市民「思考」與「表態」，「當你有言論自由時都唔出聲，香港死得o架喇」。
表態趕o靚模出書展
去年o靚模攬枕「揚威」會展時，林一峰已經極度「睇唔順眼」，但他以為這種書展o靚模化只是一時風潮，忍一忍便過，結果一年後的書展，傳媒以致市民的焦點仍然是與創作與文字無關的「o靚模」，反之他認為應該獲得尊重的書籍與刊物，卻完完全全被忽視，令原意是擴闊市民思想空間的書展變了質，「嘩！我覺得唔得喇，一定要講喇。我想提出一樣嘢，係消費者本身有責任；你有權選擇去支持定唔支持，唔係一窩蜂去做」。
外界以為他反o靚模族群，實際他反對的是一種「掛羊頭賣狗肉」的做法。「如果佢哋唔係o靚模而係另一啲人，只要同創作冇直接關係而喺書展搞事，我都會出嚟反」。他說o靚模賣肉可以名正言順，「擺明係商業行為，你唔好同我講係咩行為藝術；你去租個藝術展覽館畀佢哋，人哋批唔批吖？我好支持佢哋另外整個o靚模展」。
不少人都想將o靚模趕出書展，卻未有人大膽高叫反對，壓力可能是一大原因。林一峰說：「我咁樣出嚟講一講，承受嘅壓力都好大，可能好多人會出嚟反我。」但他依然挺身反對，是認為市民應在尚有言論自由的時候，珍惜表態的權利。他說：「反對嘅時候，要表態囉，唔好俾人食住上先得o架。點解喺一個有言論自由嘅地方發生啲咁嘅嘢，你都唔出聲？」難怪他03年身在芝加哥時，也越洋撰文筆伐23條惡法，「香港點解仲企得住，就係因為仲有言論自由」。
「罷簽」只是林一峰其中一項坐言起行反對某種做法的「事迹」。他久未吃過麥當勞、以後也會罷食，矢言一世不會做與麥當勞相關的工作，「因為佢哋係咁破壞熱帶雨林」。反對吃魚翅的他，也稱從此不再出席魚翅婚宴，「因為食物鏈會失去平衡」。
既要反對亦要保育
最近他更反對一個人，在新書《聽大樹唱歌》的序中不點名筆伐另一作家王貽興，原因是王貽興替財務公司賣廣告。「身為文化人背後會有一個責任感，佢出嚟咁樣endorse一件事，同大家講話得到財務上資助，可以30歲之前去日本體驗生活；你去同財務公司借錢實現你去旅行嘅夢想，係咪太唔負責任？我最驚呢啲訊息傳咗畀年輕人」。
「反」之餘，他當然有提出意見，例如要好好保育。早前的菜園村風波令他感觸良多。「我有個住菜園村嘅師妹，由細到大都喺嗰度種菜，一家人平靜生活好多年。忽然佢面臨危機，忽然變咗要同政府、惡霸同奸商周旋嘅鬥士，我睇到個心好酸呀。佢要保衞嘅嘢其實好簡單，但原來簡單嘅生活，一啲都唔簡單」。
曾經走入菜園村感受簡單生活的他，為菜園村事件作了一首歌《簡單不簡單》在9月的演唱會發聲，「菜園村係畀香港人睇到嘅一面好好嘅鏡，大家會睇到一個空間，對一個人嘅思想有幾咁重要」。
記者 許偉賢