曼聯中場路爾斯安達臣差啲俾架靚車害死，但英超班球星仍然冇有怕，其中利物浦前鋒費蘭度托利斯（F托）同埋曼聯前鋒朗尼，都齊齊騷自己嘅靚車俾大家睇。F托平時好低調，但佢貴為英超嘅一線球員，點可能冇部跑車傍吓身，所以最近就用16萬鎊買咗部黑色嘅雅士頓馬田DBS。靚仔揸靚車，真係襯到絕。至於朗尼亦買咗新車，日前揸部價值77,740鎊嘅AudiRS6同大家見面。但佢就唔夠隊友拿尼咁厲害，事關拿尼嘅新寵係價值166,784鎊嘅林寶堅尼GallardoLP550-2ValentinoBalboni，仲要係全球得250部。我求大俠認為，球星揸靚車絕對冇問題，只要唔超速同埋注意安全就可以。講開曼聯，佢哋啱啱推出10/11球季嘅全新作客波衫（圖），衫身係白色，兩隻袖有紅黑圖案，同以往淨白色比，似乎好睇好多。睇嚟紅魔球迷嘅荷包又要大出血。