新任私隱專員蔣任宏噚日首日返工，在一片爭議聲中履新，蔣任宏帶咗尊神像傍身，唔係風水玄學嘢，係代表公義嘅泰美斯女神（Themis）。
立法會大樓都有個泰美斯女神像，一手持天秤，另一手持劍；前者代表公正，後者象徵權力；女神蒙上雙眼，代表大公無私。蔣任宏呢個女神像就左手持天秤，右手持劍，係佢20年前遊希臘時買，一直只係旅遊紀念品，事隔20年終於派上用場，蔣任宏話日後會以大公無私精神做好呢份工。
唔想人再提郵政署偷拍
被指做郵政署長時亂裝置攝錄機侵犯職員私隱嘅蔣任宏，噚日再次辯解，指當時事前唔知道署內有人咁做，亦無計劃喺各區郵局全面安裝，不過佢話身為署長，責無旁貸，但既然事件已告一段落，佢希望成為歷史，日後唔會再講。
話雖如此，人權監察噚日重申不接受政府任命蔣任宏做私隱專員，一來佢有侵犯私隱前科，二來政府冇公開披露選擇和決定任命蔣任宏理據，質疑黑箱作業損害公眾利益。