馮仁昭四圍超：港姐亞軍又傳內定
馬賽撐張秀文實至名歸 - 馮仁昭

今屆港姐賽果鬧出唔少靠後台靠緋聞而內定賽果，噚日又有消息話亞軍張秀文（Sammi）提名人Kitty同都係港姐出身嘅契女馬賽，喺港姐競選當晚深夜食糖水，席間有人聽到話Sammi內定得獎。
噚日馬賽同張秀文、樂瞳、鄧永健、出爐港姐冠軍陳庭欣、季軍莊思明及最上鏡小姐李雪瑩參與喺馬灣舉行嘅兒童節活動。

強調港姐公平

有備而來嘅馬賽自爆之前已經識張秀文，因為張嘅提名人係自己契媽，佢強調公司選美係全世界最公平公正，評判唔會被控制賽果，都冇可能預知賽果，馬賽只係賽前有同張秀文分享選美心得。
張秀文就話同馬賽關係好好，絕對唔信報道話馬賽唱衰佢，佢深信評判慧眼公正，唔會出現內定賽果，而自己參選時為免影響父母，一度入住提名人Kitty屋企，仲大讚Kitty有眼光提名佢參選。