會考放榜前夕，考生心情緊張，其實家長可能仲驚，好多家長噚日一早就為子女打點如何撲學位，即使仔女成績唔好，都仍然有機會讀書，有家長仲誇張到帶埋手提影印機出街，以便即時就地影印成績單、文件交畀學校報名。
中大校長沈祖堯女兒詠恩都係末代會考生，沈祖堯前晚等待女兒會考成績時，心情都有啲緊張，但都要好輕鬆咁安慰女兒。沈祖堯女兒讀女拔萃，噚日獲得8A1B佳績，沈祖堯太太陪女兒返學校攞成績單，知到成績後第一時間通知沈祖堯。
沈詠恩有資格拔尖
沈祖堯話衷心感謝女拔萃校長劉靳麗娟同全體老師，又會親吻女兒以示鼓勵，噚晚一家人食飯慶祝。詠恩經濟科攞B，佢話父親有教佢理科，但從來冇畀壓力佢，攞到8A有少少意外。詠恩有資格拔尖入大學，至於會唔會讀醫科，佢話會考慮吓，會唔會入中大呢？詠恩冇表態，有人話詠恩好似鍾情父親母校，即係港大多啲，沈祖堯則話唔會干預女兒選擇升讀邊間大學同學科，總之畀佢自己決定。
梁栢賢陪女攞成績單
沈祖堯噚日因為另有工作冇陪女兒返學校攞成績單，醫管局質素及安全部總監梁栢賢，則抽時間陪女兒等候歷史時刻，梁栢賢女兒穎曦有5A4B，成績都算標青，夠晒分原校升中六，可惜不能拔尖，不過梁栢賢透露女兒考慮到英國讀書，由於準備留學，所以心情不太緊張。穎曦則話可能會諗吓讀醫科，好似父親咁做醫生，梁栢賢話女兒日後想讀咩冇乜所謂，由佢自己決定。
近日因為包致金姪女案經常曝光嘅警務督察協會主席廖潔明，女兒都係末代會考生，八方問佢女兒成績如何，廖Sir話女兒私隱不便透露，總之夠分原校讀預科，不過佢話女兒喺一般學校讀咗咁多年書，有機會想轉吓環境，讀唔同學制，所以早前已經幫女兒報讀國際學校，既然已幫女兒鋪定條路，噚日當然冇擔心啦。
mailto:[email protected]