將喺本月21日舉行嘅無綫《2010香港先生選舉》，10位參賽者噚日喺九龍灣進行咗一場水球友誼賽，唔知係咪唔想再有激凸場面，10位候選港男全部着晒短褲落水，比賽分成紅、藍兩隊喺泳池進行，最後由6號鄭文康、7號許健森、8號劉志偉、9號葉家泓及10號翟威廉組成嘅藍組贏咗冠軍，9號葉家泓仲奪得「傑出表現獎」。
預計有10分
成日喺比賽出醜嘅3號黃田麒，見到佢喺水中好辛苦咁跑去搶波，不過跑跑吓見佢企喺度㩒住心口唞大氣，事後佢話：「我頭先飲咗好大啖水濁親。」跟住有記者話佢啲體能好似差咗啲，佢笑笑口話：「係呀，所以我靠腦多過靠體力。」言下之意係咪寸其他港男冇腦呀？佢話：「梗係唔係，大家係兄弟，我有信心將啲弱項變成強項，我會好好鍛煉體能。」講到尾咪即係要操弗自己啲體能囉！
貴為「末代會考生」嘅9號葉家泓，講到今次會考嘅信心，佢就話：「一般喇！我估自己有10分，我聽日請咗假返學校攞成績表。」佢仲承認參選係為自己買個保險，至於會唔會入行做藝人，佢就話：「我留咗位報讀IVE嘅design，睇咗考試成績先再算。」