等完前日滙豐放榜，又輪到今日會考放榜，記得當年自己最緊張就係可唔可以成功在原校升讀預科，得唔得都已成定局。記得自己會考嗰一年，明知過完農曆新年就考MockExam，但係自己就由年初一到年初三都跟同學落咗去寶勒巷嘅酒廊聽歌飲嘢玩不羈，美其名出去減減壓，其實想放肆一下。
假若今天未能達標，就應立即作檢討。其實做人一定要向前看，最緊要仲係要保持一份永不放棄嘅精神，做人與經營企業嘅原則其實無咩唔同。
啤酒銷量跌怪交警嚴查
中港兩地均正處業績放榜高峯，今年在業績公佈前發盈喜及盈警公司數目好多，可以話係無日無之，綜合業績走樣嘅理由，竟然係林林總總，有些更令人啼笑皆非。內地上海上市嘅惠泉啤酒上半年銷量跌咗兩成多，竟然怪罪於交通警察嚴查酒後駕駛令銷量下降。ST大水中期虧損由28萬大增至1200萬元，重複使用同一個理由，怪罪於廠房要配合奧運並符合空氣質素要求而停產，然而同一個理由已樂此不疲地用了第三次。製造電解鋁嘅金馬集團，上半年虧損達1.3億元，更加在賴無可賴之下，怪旗下子公司恢復生產同室操戈搶生意。
火力發電企業長源電力上半年錄得過億虧損，竟然話係因湖北雨災令水力發電更吃香，火電與水電爭利，何以長源電力本身亦同樣有水電資產，那又應如何解釋？
講到政策幾時都係中資股最大風險因素，有企業如深南電A股就索性賴政府燃氣發電補貼尚未落實引致其巨額虧損，凍肉股高金食品亦同樣賴政府補貼未到位令其虧損。香港上市公司未至要儍到侮辱小股東智慧，只係若同一個天空同一個板塊嘅業績差天共地，投資者係應該列晒行內對手數字出來比較，然而今時今日個個食慣快餐，又何來閒情去慢慢比較。
胡孟青
作者為獨立股評人