StarCraftII必玩英文版 狠挑鬼佬

StarCraftII必玩英文版 狠挑鬼佬

3年又3年、3年又3年、加埋剛好12年,唔係計阿仁幾時可以除名,而係講緊超經典即時戰略遊戲《StarCraft》終於推出第二集《WingsofLiberty》!早幾日開賣更引起網友廣泛討論,不過話題唔係評遊戲內容,而係選購中文與英文版嘅分別。佢哋建議,若自認有功夫根底,唔好諗,梗係玩英文版同鬼佬隻揪啦!

記者:陳國輝

新兵種要等升呢

中英文版有乜唔同?當然唔止語言同文字上嘅分別啦!網上嘅《SC》老忠Fans話,雖然中英文版都可以透過Battle.net連線搵對手,之但係中文版原來有地區限制,只係得中、港、台三地咋;嫌亞太區無乜高手,咁就要揀英文版,事關佢會連結全球Server,即係話,美國同歐洲等高手雲集嘅地區,通通有機撩你隻揪;至於英文字幕點解決?Fans話,唔理得咁多喇!
今集仍然由人類(Terran)、神族(Protoss)同埋蟲族(Zerg)三大種族孭飛,由於新一集內容加強咗,加埋新舊《SC》粉絲齊齊Online,兵種方面亦都明顯多咗,例如人類種族就追加大地雷神,增強防衞能力;又如經變種後嘅王蟲,佢本來可偵測隱形敵人,但家要升呢先做到喇!

■人類種族同上集一樣,以高防守力見稱。

■選兵種之前,最好先諗定自己嘅行軍策略。

新舊版圖玩穿插

影響成敗又點止兵種一項因素!記得12年前《SC》幾乎以全2D顯示,欠立體感之餘,成班角色混戰期間,刀來劍往,以致畫面非常混亂!到第二集已經唔同晒,一來採用3D圖形引擎,版圖細緻又豐富咗,二來新加入咗好多戰場,地形比以前更加複雜,也提升咗Fans嘅耐玩度;不過,如果你想重溫第一集嘅經典戰場,《SCII》都一樣有得玩,順便俾舊Fans回顧吓。

■網上粉絲話寧願買英文版挑戰高難度,都唔要屈喺香港做井底蛙!

■山脈地形經3D重現之後,立體感比以前靚好多。

■新版圖提升咗難度,想殺敵就要利用地形優勢。

動畫演繹逼真

不得不提《SCII》嘅過場動畫,除咗經常會出現槍林彈雨嘅爆炸場面,人類角色嘅模擬程度亦相當高。就以一段叛軍領袖JimRaynor嘅對話為例,唔單止皮膚顏色極像真,而且臉上有粗幼不同嘅皺紋,另外,喺說話時口形幾乎同發音係一致,所以電影感可謂逼真一流。但都係嗰句,玩得《SC》系列嘅話,最重要不在於動畫,而係遊戲機制,以及實時嘅戰鬥快感啫!

■呢一幕類似《Biohazard》嘅場景,喺《SCII》都有。

■蟲族行軍速度快,隨時令你措手不及。

Profile

$539(英文版)
$498(中文版)

平台:PC
類型:多人即時戰略
開發:BlizzardEntertainment,Inc.