末代會考今日放榜，有同學仔會攞好多條A，亦有同學仔會好多個U，無論係考得好抑或唔好，我求大俠認為，佢哋都應該學習吓祖雲達斯後衞基亞連尼對讀書嘅態度。事關呢位意大利國腳喺球場上係殺人王，但走出球場就係一名讀書人，喺一邊踢波一邊讀書下，成功攞到個博士學位，真係令人敬佩。
畢業論文寫祖記
喺歐洲球壇，頂級球員平時練波同埋比賽經已好忙，加上踢波人工超高，閒閒哋年薪過千萬港元，所以真係冇乜邊幾個會有恆心去讀書。如今基亞連尼能夠兼顧埋讀書，仲要喺25歲之齡就可以喺意大利著名學府都靈大學（UniversitadiTorino）攞到個經濟學博士學位，確係唔簡單。不過，佢認為自己冇因為成為博士級球員而有所改變。
基亞連尼話：「我博士畢業唔算係一件好叻嘅事。我喜歡平靜嘅生活，同家人一齊就經已好足夠。」查實基亞連尼喺05年加盟祖雲達斯之前，就經已係高中畢業，成績仲唔錯，所以亦順利進入都靈大學主修經濟，而且讀埋英文。佢份畢業論文嘅題目係《球會的財政預算分析》，足足有成25頁紙，仲用所屬球會祖雲達斯作為其中一個案例分析。聽聞佢篇論文寫得非常之好，獲得學院高度評價，所以亦一剔即過。
場內狠辣場外好學
講到讀書心得，基亞連尼就咁講：「我覺得自己係一個好有紀律嘅學生。而我喺足球比賽上學習到紀律呢樣嘢，對我亦有好大幫助。」不過，基亞連尼喺球場上以狠辣見稱，腳腳去盡；舊年11月就喺一場國際隊友賽，意外踢中效力阿仙奴嘅荷蘭前鋒尹佩斯嘅足踝，搞到對方要長休5個月。估唔到佢喺球場以外嘅一面，會係一個讀書人。
話時話，聽講曼聯對佢好有興趣，但我求大俠認為佢啱踢阿仙奴多啲。點解？係人都知阿仙奴領隊雲格係高材生，而且都係主修經濟，所以佢哋兩個肯定啱嘴型。