公民黨司馬文（PaulZimmerman）噚日喺大班黨友同薄扶林區街坊力撐下，正式宣佈參加薄扶林選區補選。因為同世界盃神算八爪魚阿Paul同名，被黨友冠以「公民黨八爪魚」稱號的司馬文，由黨友以車輪戰方式，喺預先準備嘅地圖上，將佢過去成功爭取保育嘅地點貼上八爪魚貼紙。
兩個仔撐場
由於司馬文係城市規劃專家，加上做過共建維港委員會多年，成功爭取保育地方多不勝數，地圖上嘅香港島，好快就俾大堆八爪魚「」咗。84年已東來、喺香港定居26年嘅司馬文，廣東話仍然半鹹淡，但噚日就好努力講，介紹自己係「荷蘭人」時，搞gag話自己亦係「好男人」，又指薄扶林選區有唔少問題「好難忍」。
鬼佬參選區議會，贏面大家心中有數，司馬文承認廣東話肯定不及對手劉應東，不過薄扶林區選民英文唔差，佢覺得問題不大。司馬文兩個仔噚日亦有撐老竇，司馬文透露，其實佢個香港老婆都想嚟撐場，但由於要湊今年6月4日出世嘅細女司馬文懿，所以只能精神上支持。