求大俠上個月提過，巴治奧（圖）將會出山做意大利足總技術小組阿頭。呢位深居簡出嘅一代金童前晚終於現身喺羅馬嘅意大利足總總部。43歲嘅佢風采不減當年，鑽石耳環、墨鏡加上悉心修剪嘅鬍鬚，呢副「型佬look」轉行做藝人可能仲啱。心繫意大利足球嘅巴治奧，同足總主席阿巴迪傾咗兩粒鐘之後，已決定接受新挑戰，仲會喺今日正式被足總委任兼同傳媒打招呼。
據求大俠所知，巴治奧今次做技術部主管除咗發掘同培育新人，仲可以向國家隊教練柏蘭迪利畀意見，絕對任重道遠。話時話，巴治奧家陣一頭白髮，滄桑得嚟不怒自威，如果全身投入教波，話唔定可以做「銀狐」納比嘅接班人！