港大民意研究計劃最新數據顯示，幾個拍撐政改電視廣告嘅行政會議非官守成員知名度忽然彈起，其中梁智鴻同胡紅玉更加首次登上五大行會成員榜，將原來喺榜上嘅劉江華、劉皇發「逼」出榜外。
呢次民調上月中訪問咗約1,000名市民，梁智鴻同胡紅玉嘅認知度，分別有73%同66%，兩人民望分別係47.2分同42.1分；喺五大行會議員榜上，梁智鴻排第二，胡紅玉排第四。民望最高嘅行會成員係夏佳理，有48.8分，雖然連續一年高踞榜首，不過較本年4月勁跌6.3分。
梁振英民望跌2.6分至45.6分，排第三位；鄭耀棠在五大中排最尾，民望41.8分，較4月時跌咗3.4分；因認知度較低而不入五大、但都有拍撐政改廣告嘅張炳良，7月份民望都較4月時跌咗3.9分至46.7分。負責民調嘅民研計劃總監鍾庭耀認為，同佢哋參與「起錨」活動有關。