巴塞隆拿周三展開亞洲之旅首站，在南韓首爾世界盃球場面對韓職明星隊，以「新球王」美斯，以及丹尼爾、伊巴謙莫域等外援領軍的巴塞，料與主隊合演鬥攻戰，熱捧「大」。（球賽編號：星期三1；now632台今日7:00pm直播）牽牛
巴塞隆拿今夏亞洲之旅只進行兩站，今日先鬥韓職明星隊，下周日到北京與FC北京友賽；由於佩奧爾、沙維、恩尼斯達等世界盃冠軍功臣仍未歸隊，保贊及謝法倫兩名小將又代表西班牙小國腳出戰，巴塞訪亞大軍主要為外援及B隊成員。
巴塞友賽多波入
不過，沒有西班牙國腳的巴塞仍然星光熠熠，美斯、伊巴謙莫域、施度基達等均在陣，新軍艾迪安奴亦料披甲，B隊小將方面，莊拿芬杜斯山度士上季已展示天份，以上仗友賽華拉倫加也可入4球，今仗面對韓職明星隊，相信入球也如拾草芥。
當然以今仗只屬表演賽，亦有慈善賽意味，巴塞隆拿一向擅於「搞氣氛」，後防亦料不積極；事實上今仗起用的後防，如門將賓度，後衞艾比度、米列圖不是傷患纏身，就是正走下坡，當銳的丹尼爾和艾迪安奴又擅攻不擅守，對華拉倫加尚且也失兩球，今仗亦勢難保清白身。
韓職明星欠默契
為慶祝南韓與西班牙建交60年，韓職明星隊由以往與日聯明星隊友賽，「升呢」至挑戰西甲班霸巴塞隆拿；陣容方面，亦算是國內聯賽精英，李東國、李昇烈、鄭成龍等世界盃南韓國腳均在陣，外援亦有盧斯奧迪奧費路、伊連奴等；當然這種類似NBA明星賽的點兵制度，自然難求各將可培養默契，近年兩次面對日聯明星隊，均有失球。既然兩軍均入得又失得，博入球「大」固然合理，亦可兼顧總入球[4球]及[5球]。
星期三1
韓職明星隊vs巴塞隆拿 2:3
半全場：和/客
盤口：韓職明星隊[+1]
讓球主客和：D和局
《巴塞花絮》
巴塞好心有好報
巴塞心口贊助係慈善機構，今場友賽亦都繼續行善；今次比賽，大會邀請600位弱勢社群嘅小朋友（圖），免費入場欣賞巴塞眾星風采，巴塞又捐出波衫、紀念品等拍賣，收益就撥歸當地慈善機構，改善學童環境。好人有好報，唔怪得巴塞呢幾年年年都有盃捧啦！
南韓記者寸美斯
西班牙國腳冇隨隊征韓，美斯同丹尼爾就成為巴塞孭飛球員，周一記者會上，南韓記者仲好唔識性，問美斯世界盃出局有咩感想，好彩美斯都仲算大方，講大敗畀德國，對佢打擊都好大，不過世界盃已結束，做人唔好成日沉醉喺回憶中，仲好有信心幫巴塞捧盃補番數。
馬基斯臨別擦鞋
墨西哥後衞馬基斯係就係從巴塞出發，不過唔係去首爾，反而去紐約加盟紐約紅牛，同亨利再做隊友；馬基斯臨別都仲好識做，話自己一世都係巴塞球迷。
法比仔現身巴塞
巴塞隆拿大軍遠征南韓，但盛傳加盟巴塞的阿仙奴中場法比加斯，卻現身加泰隆尼亞省，唔通已秘密加盟球隊？非也，法比加斯今次返回出生地ArenysdeMar，係巴塞附近嘅小鎮，當地人為佢舉行世界盃慶祝會，有成3,000鄉親出席，法比仔更感動到喊。不過期間又有鄉親叫口號，叫法比仔去巴塞，繼西班牙慶祝會上被「套」上巴塞波衫後，又遇到尷尬場面。