上周五凌晨時分，城中蘋果迷空群而出，為的是要第一時間搶閘入iPhone4行貨，由於電訊商均已與蘋果簽約，只可在凌晨12時正式踏入周五才可以發放實物手機予客戶，成功令引頸以待的客戶為新機發佈製造萬人空巷話題式場面。當晚各大電訊商各出奇謀，在IFC擺陣的數碼通（315）早已在網上預先為2千名有興趣客戶做登記，CSL就營業到凌晨，第一時間招呼已預訂手機客戶；但論星光熠熠，就要數和黃旗下3香港，在旗下君綽酒店頂層擺的明星名人陣容最強勁，霍大班都親自現身上陣打氣支持。
然而，在同一個凌晨出機的人士當中，亦有唔少人即時買機上台後，眼見網上Bid緊成8千幾蚊，忍唔住賺一轉快錢，由此反映，香港人向錢看的嚴重程度。
和電香港中期息增1.96倍
對於心大心細用緊唔同牌子手機的用家來講，佢張電話卡用到microSim就真係幾毒，擺到明要你冇得返轉頭用回其他手機。由於一向好怕被支配，所以一向唔會用網上銀行，亦無登記日日賞或自動增值服務，更加唔想俾喬布斯主宰生活。
正面睇，被主宰的智能手機用家，也為市場作出唔少貢獻，睇和電香港（215）中期業績可以發現，首6個月整體營業額增長5%至42.83億元，當中流動通訊業務營業額增長7%至28.31億元，佔總收入66%，主要由數據服務增長帶動，每客戶每月平均消費由去年202元上升至214元，中期息增加1.96倍至3.32港仙，年初至今獲李超人自1.28元至1.66元連環增持至73.01%持股，摩通亦在業績公佈前（7月23日）增持至5.1%之必須曝光水平，擺明撐佢，無他，現價就算唔增加派息都有3厘以上，去年派息比率竟達75%，中期息仍相當於44%派息比率，今年息率回報坐望4厘，肯定係一隻肯為媽媽服務兼可以買來收息之CashCow。
胡孟青
作者為獨立股評人