拉利今年重頭戲458Italia即將到港，同你講車價四萬幾，你一定噴晒口水話我吹水；但若然話只係一架1:5模型車，你亦會噴晒飯嚇一跳。無錯！四萬幾足夠買架二手車代步，但偏偏呢樣富貴玩具，喺香港越嚟越紅，仲幾乎架架賣斷市，開拍《ToyStory4》實做硬主角啦！
記者：徐影龍
攝影：陳盛臣
Model：Rita@PureModels
港人勁Buy靚冧巴
香港地周街都有模型車舖，不過屬細比例款式，好似1:5這類巨型玩物就唔係咁易搵。Amalgam模型技術世界聞名，就連拉利喺意大利的發佈會，都係用佢啲模型車助興。最矜貴係每款車都玩全球限量，旺角永捷模型睇中華人「貪老利」性格，專登攞晒靚Number回港賣，店舖太子爺章先生誤打誤撞下發現商機，「老頭子間舖本身賣遙控車同零件，機緣下我Bid咗架1:5大比例模型車返嚟，擺喺舖頭小試牛刀，估唔到幾萬蚊架模型車，4日內就被人買走。跟住開始同玩具廠直接聯絡，仲同佢哋攞8、18、28、88呢啲超靚Number返嚟，基本上未到香港已經有人落定喇！」
Ferrari458Italia
$43,000（編號199）
內櫳像真屬高難度
MP4-12C係麥拿倫不用BenzAMG偈，首度用自主研發的引擎，正式跟平治分道揚鑣，可算是McLaren歷史上最重要車款。有超跑博士之稱的MichaelShum，原來都是模型車發燒友，「橙色係麥拿倫代表色，呢架模型車梗係攞足廠方油漆數據，跟足晒嚟噴，連坑紋、碳纖都做得好像真。你睇吓個駕駛艙，同真車近乎一樣，連最難做嘅真皮同橙線車邊都一樣重現，技術相當高。」
McLarenMP4-12C
$43,000（編號8）
其餘熱賣車款
罕有拉利GTO
拉利歷史上第三款GTO，比普通紅頂版足足偷輕100kg。碳纖內櫳及麖皮座椅又像真到嚇死人，連地台都跟足用金屬板。
街車款一樣靚
雖然車門唔開得，內櫳屬封閉狀態，但中置引擎的散熱板、碳纖喉又多又靚，鍾情落場版的朋友，亦可揀另一款利曼拉花，價錢一樣。
答案：左的是真了；右的假得真。
查詢：27820399（永捷模型）