前郵政署長蔣任宏夾硬俾政府黃袍加身，接替吳斌做個人資料私隱專員，坊間換馬聲不絕，可惜政府似乎借咗聾耳陳隻耳，企硬唔肯換將。
民主黨副主席劉慧卿一直好質疑，政府口口聲聲話有成百二人應徵呢個職位，相信當中不乏猛人，所以佢絕對唔相信有侵犯私隱前科嘅蔣任宏咁打得，可以打得低百幾個對手接棒。
卿姐認為政府識趣嘅話，就應該速速換人，咪等佢變成平機會前主席王見秋第二，上任冇耐就搞出大頭佛要執包袱走人；又或者要等到啲乜乜苦主大聯盟嚟踩場，逼到蔣任宏要自己下台時，政府都好丟架啫。近期發生嘅八達通風波，肯定好多手尾跟，卿姐力促政府搵更稱職嘅人返嚟搞掂八達通風波好過，否則形同自掘墳墓。