當香港好多人嗌起錨之際，象徵港人衞國情懷、民族大義嘅保釣船釣魚台二號，卻悄悄拋錨。保釣行動委員會由於欠債逾70萬元，冇能力再月花2萬元養住保釣二號，兩個月前決定賣船。保釣行動委員會主席陳妙德同八方講，本周會開會討論再次出征釣魚台事宜，最快月底啟航，若順利出發，保釣二號完成最後一次任務，回航後就會安排賣船填債，預計可賣到80萬。
保養維修一年20萬元
保釣二號去年5月起錨去釣魚台宣示主權，卻被海事處阻撓，船東同船長仲被檢控罰款，陳妙德噚日表示，應該唔會再提出上訴，因為要趁近日好天氣，決定是否啟航再闖釣魚台。不過佢話就算呢次成行，相信都係保釣二號最後任務，事關保養維修艘船，一年最低消費20萬元，保釣行動委員會因此欠債纍纍，為免深陷債務黑洞，惟有賣船。陳妙德稱保釣二號多次載佢哋冒險，其實好唔捨得賣船，「日後想再出海，唔知有冇人租船畀我哋」。
陳妙德強調保釣行動委員會會繼續其他抗議同教育活動，「明年係釣魚台淪陷40周年，我哋諗住搞多啲研討會同去學校演講。」保釣二號出師未捷，保釣行動委員會內務秘書古桂耀坦言「好心酸」，佢承認近年籌款成績欠佳，7.1遊行籌到萬多元算多，「平日喺中環，企半日籌到幾百蚊咋」。
保釣運動陷入低潮，中國與日友好卻越唱越高調，古桂耀說沒有官方撐腰，民間保釣好艱難，「內地保釣人士嚟香港同我哋開會都被禁」。第一波保釣運動上世紀70年代開始，多年來兩岸三地、海外華人都有參與，古桂耀話香港保釣運動高潮應該係96年出海嗰次，當年陳毓祥不幸溺斃，後來港、台保釣人士殺上釣魚台揮動五星紅旗同青天白日滿地紅旗，可惜係絕響。「雖然近年保釣冇氣氛，市民唔熱烈，不過我哋個心永遠喺度。」
近日有80後申請入會
陳妙德有信心保釣薪火相傳，「今年有幾個80後入會，另外有兩個17歲後生仔申請入會，不過我拒絕咗，要佢哋問過父母，遲一、兩年夠18歲先入會」。
mailto:[email protected]