花旗股市上禮拜五雖然冇乜大變化，但噚日亞洲股市普遍造好，港股仲升近400點收市，除咗因為A股強勢之外，股民憧憬收市後滙控（005）公佈嘅業績會理想有關。
滙控業績冇令fans失望，中期盈利升1.02倍，未來盈利可睇好，但派息政策未變，暫時唔會大炒，不過短期仍可上升，恒指短線目標區仍為21750至22400。
比亞迪C輪22848：比亞迪（1211）噚日報收55.95元，成交大增。畢菲特大熱「接班人」上位之作就係投資喺比亞迪，睇嚟「股神」投資比亞迪會作長線持有，汽車股全面轉強，比亞迪啱啱起步，上升空間吸引，破65元睇68元，可以諗吓隻C輪22848。
隻輪現價8.6仙，2010年11月29日到期，行使價54元，溢價11.9%，引伸波幅60.2%，有效槓桿率4倍，正股見68元，22848睇17.2仙，正股跌穿52.50元就沽咗隻輪。
俊樺