廣州人、香港人近期熱撐「廣州話」，掀起呢番語言風波嘅源頭就係廣州亞運會，而中國田徑協會日前公佈入圍選手嘅新規定，亦都引起外界熱論，皆因「得益者」就係要「頂硬上」比賽嘅欄王劉翔。
今屆廣州亞運會嘅宣傳口號為「激情盛會，和諧亞洲」（ThrillingGames,HarmoniousAsia），之但係家全廣州都「人神共憤」，好明顯呢樣嘢睇嚟都真係做唔到。我求大俠唔知係唔係為咗平息民怨，中國田徑協會日前就公佈咗入圍選手嘅新準則，就係「獲得奧運會、2009年世界田徑錦標賽前6名的在役運動員，都具有2010年亞運會參賽資格。」令到劉翔可以直入亞運會。
「特例」擬為劉翔而設
根據原本2月公佈嘅規例，亞運參賽資格係規定09年世錦賽獲首3名、或本月初嘅全國田徑賽獲優異成績，但劉翔去年腳傷無玩世錦賽、早前亦話唔玩全國賽，理應無緣今屆亞運，之不過此「特例」一出，令到喺04年雅典奧運會贏咗男子110米欄金牌、貴為「中國田徑史上第1人」嘅劉翔，就可以「預訂」咗參賽資格。事實證明呢條「特例」係為咗劉翔一人而制定。而中國嘅網民都有兩極意見，一係認為劉翔憑此例參賽「可恥」，一為支持有傷但仍然奮戰嘅劉翔，而我求大俠覺得呢個做法係有商榷嘅餘地，之但係我都係支持劉翔出戰架！
原因當然係同比賽可觀性有關啦！皆因貴為「國寶級」嘅劉翔真係唔係容易見到，如果佢突然話唔嚟，已經喺「廣州話」問題上怒火中燒嘅廣州群眾，仲唔火上加油搞到一發不可收拾！何況依據08年上海鑽石聯賽經驗所得，如果沒有劉翔參賽，門票根本賣10元人民幣都無人問津。去年劉翔全運會奪冠嘅時候，總票房即時暴漲超過1,300萬元人民幣，所以劉翔即使有傷在身，佢「為國家、為廣州」點痛都要「頂硬上」參賽，先至可以確保已經豪花咗超過200億元人民幣嘅廣州亞運，有番啲吸引群眾入場嘅亮點，總算係為廣州市政府幫補吓。我求大俠亦都期望「為國捐軀」嘅劉翔最後奪冠啦！