七月初，有人向廣州市政府提議，要求將廣州電視台主要頻道，由粵語改成普通話，所以就傳出內地有興普廢粵嘅構思。最後搞到過萬廣州市民上街，以為事件暫時告一段落，好多有份上街遊行嘅市民就叫當時維持治安嘅公安「收貔」。杜汶澤就喺佢嘅微博解釋乜嘢叫「收貔」同埋佢嘅出處，點知段文出咗冇耐，就被一向注重和諧嘅微博河蟹咗。
轟自我審查嚴重
事件發生之後，阿澤好嬲咁喺自己個微博度，講咗句明代廣東名將袁崇煥嘅名句「掉哪媽」。噚日阿澤接受記者電話訪問時，佢話：「我好明白個遊戲規則，你河蟹我前都睇吓我寫啲乜先啦，我講番乜嘢叫『收貔』，其實係因為賭檔門口鍾意放貔貅，寓意有入冇出，每到收工人哋收番埋隻貔貅，『收貔』即係叫人收檔咁解。」
阿澤話微博自我審查太緊要，小小事就河蟹人哋。佢自己就絕對支持保留廣州話，佢話：「普通話只係共通語言，每一地方都有佢獨特語言同文化，廣州話有佢存在嘅價值，當然值得保留啦。」