黎明力捧新人JW一直以「神秘」手法宣傳，即使早前搞音樂會也只是齋唱騷功力，沒有埋身訪問。昨日JW由黎明陪同現身新碟記者會，即場公佈新碟定單已達2萬多張。JW在台上首度開腔說：「我就快要去讀書，我會努力。」
黎明新寵JW昨日穿上深藍色外套襯以長直髮，打扮比起19歲真實年紀依然顯得成熟，但相比起上次音樂會的「麗花皇宮」打扮已表現較切合年紀。現場見JW明顯怕醜，眾高層發言後，司儀戲弄她說：「我知你今日實有嘢想講，你可以講啦！」現場還公佈JW新碟定單有27,035張，更有律師樓代表作證，相當認真。
「就快去讀書」
JW笑笑口說：「多謝所有鍾意我嘅人，鍾意我音樂嘅朋友，我就快要去讀書，我會努力，希望到時大家會支持我。」稍後JW返英國讀書，要待假期才有空檔錄音做歌。黎明透露JW的母親堅持她要完成學業，所以才以特別方式宣傳，他又承認JW的處女碟製作費比以往的歌手多，他說：「做唱片要用唔同方法，要睇做幾長久先成為真正藝人，有知名度，令大家認同，咁先衍生回報率，唔可以培育嘅時候，畀少啲奶粉佢飲，我有信心佢可以做到長線。」
問黎明刻意安排JW不接受訪問，是否怕被轉移視線？他說：「我知你哋想問乜，都係問吓佢背景，係咪叻過Janice（衞蘭）呢啲，等佢讀完書踏入社會先面對將來，想佢focus讀書，做個校園歌手先。」問黎明會否為JW於年底再推出唱片？他說：「出咁多做乜？或者明年先。」
至於JW會否角逐新人獎，黎明表示：「佢媽咪講過讀咗書先，報答咗媽咪先。攞唔攞到獎唔重要，有獎又唔會令佢『娶』到個好老公，而且家頒獎禮變成一個騷，每個台都有自己friend底，要捧嘅人，如果自己走入人哋嘅制度，即係對自己唔公平。」
黎明否認偏心
至於JW合約會否較長，黎明又以金句回應：「唔好用長短嚟計，人嘅壽命幾長都度唔到啦！」黎明又否認公司偏寵JW，他說：「大家宣傳期唔同，衞蘭紅館演唱會製作，我都有參與，下月底佢同JaniceMan套戲上映都做宣傳，一步步嚟。」
採訪：王連連
攝影：陳志嵐