大嶼山果然地靈人傑，寶蓮寺住持釋智慧08年中風入院，休養兩年健康大有起色，噚日出席昂坪廣場開幕禮時精神甚好，雖然出入仍要人攙扶，但唔使用枴杖，回復昔日七、八成神采。
去年9月釋智慧透露，一年後寶蓮寺董事局會討論其去留或接班人問題，外界盛傳兩個首座和尚宏通、健釗都有可能係新任掌門人；大師噚日冇講交棒問題，八方睇佢狀態咁好，相信好大機會再坐一會，加上寶蓮寺耗資二億元嘅擴建工程明年竣工，大師又點可以抽身而退呢？
釋智慧留任有迹可尋，今年初周啟邦、龔如心家姑任玉珍喪禮，釋智慧都獲邀做法事，再次十分活躍於政商界圈子。噚日揭幕嘅昂坪廣場，幾年前因釋智慧要求政府批地畀埋寶蓮寺負責，引起一場封山風波，當時負責嘅高官孫明揚，要坐直升機去寶蓮寺同釋智慧講數。