公民黨今日正式宣佈派出司馬文喺南區薄扶林選區補選披甲上陣，決戰葉劉新愛將劉應東。雖然擁有基本盤嘅匯賢選情被看高一線，但葉劉不容有失，成個暑假死守香港睇住大局，直至9月5日補選後先會離港放暑假。
如果補選勝出，匯賢今年就三喜臨門，之前兩件喜事分別係陳岳鵬榮升特首辦特別助理，同埋匯賢灣仔區區議員黃楚峰喺智庫內搵到意中人，年底共諧連理，為香港減少一個剩女，身為半個媒人嘅葉太話好高興。除咗助選，葉太仲安排唔少「暑期活動」，例如去學校講talk，以及搞政策研究，噚日仲喺馮檢基同黃毓民安排下去深水埗參觀社企運作。另外上星期煲呔仲請佢食飯，答謝佢喺政改方案中投票支持。